13 أكتوبر، 2008

تـــــــاج أجمـــــــل أيامنــــــا

تـــاج أهــــداء من صديقى العزيز / عماد الدين يوسف . محرر مدونة 2lbgare2 ~~

- أذكـــــــــر ستة أسرار قد لا يكتشفها من يقابلك لأول مره!!!

1) كل اللى هيشوفنى لأول مرة هيحس انى انسانة عاقلة جدا وراسية زى ما كبار السن بيقولوا . لكن انا بحب الضحك والهزار قوى . وبعدين انا عايشة حياتى كويس قوى ومستمتعه بكل حاجة فيها .

2) كل اللى هيشوفنى لأول مرة جايز يفتكرنى مغرورة وتنكة . لاء وايه كمان ده بيقول عليه انى بحب افرط سيطرتى على اللى قدامى . بس ده نابع من انى مش بعرف اخد على الناس بسهولة يعنى مش اول ما اعرف حد احكليه بقى عنى بحب ايه واكره ايه زى ما المعظم بيعمل . وكمان ده لأنى مش بقدر اثق فى الناس بسرعة . وطبعا دى وجهات نظر

3) اى حد يتكلم معاية اول مرة عمره ما هيحس قد ايه انا داخليا رومانسيه وبحب اعمل اى حاجة بأحساس ولما اكون بكلم فى اى موضوع لازم اعلق بكلام نابع من جوايه . وده طبعا لأنى عمرى ما هتعامل بطبيعتى مع حد بشوفه لأول مره . وبيبقى اللى باين من شخصيتى انى جد قوى وعصبيه فوق العنيف ......

4) يمكن يلقينى بسرح كتير وعنيه بتروح وتيجى كتير . يعنى مش بتعرف تثبت فى مكان واحد . وعشان متستغربوش . يمكن انا حد بيتحرج بسرعة ومش بعرف طول ما انا بكلم مع اى حد افضل مركزة فيه وبصله وطبعا عنيه بتبقى زايغة . وممكن الشخص اللى قدامى يفتكر انى مش عايزة اتكلم معاه . ومش طايقة حتى انى ابصله وحصلت معاية كتير . بس انا عادة لما ببقى مش حبة حد بقله فى وشه . ومش مهم المهم انى مبقاش منفقة واضحك فى وشه وانا مش طيقاه .

5) اى حد بيتكلم معاية اول مرة مش هيصدق انى لسه انسة و مش متجوزة . متفهموش غلط . اقصد هيلقينى عارفة يعنى ايه مسؤلية . عارفة يعنى ايه الواحدة تبقى مسؤلة عن بيت ومتحملة المسؤليه . وهليقينى بتكلم كتير عن الطريقة اللى المفروض ان الست تعرف تعامل بيها جوزها . وده لأنى بأستمرار شاغلنى الموضوع ده . وكتر الخلافات بين المتجوزيين . وبحاول اعرف كتير عن معاملة الزوج اللى تخلينى اكسبه . عشان انا بخاف جدا من الفشل ومش مستعده بعد كل التعب اللى انا شوفته فى حياتى .احس انى خسرت . وبعدين مؤمنه ان الانسان لازم يبذل مجهود عشان يحس بعديه بسعادة . عشان كده ممكن اكون بتكلم شوية زى المتجوزيين فى خلافاتهم ونقارهم ........

6) من غير غرور واللهى دى بس ثقة . طبعا اى حد يتكلم معاية لأول مرة مش هيصدق انه ممكن يلقينى بعديها بميت راجل وممكن يعتمد عليه اكتر من رجالة كتير . عشان مؤمنة ان الانسان موقف . وان الصحاب مكانتهم كبيرة بس اللى يستهلوها . والحمد لله بيعرف بعد كده انى موضع ثقة من الناس كلها . ومعظم اصحابى بيحبونى جدا وبيثقوا فيه قوى . وعشان عاقلــــــــة . بيغدوا راى فى حاجات كتير . والحمد لله بيلقوا رأى كويس وعاقل . بس بيتهمونى بالقوة اللى زيادة عن اللازم . مع انى مش كده واللهى . بس ده رأيهم هما ..... ما علينا

يارب لغايط كده متكنوش زهتقوا منى . ونرجع نكمل بقى عشان تعرفونى اكتر..............

سبع حاجات نفسك تعملهم!!!!

1) اول حاجة دى اهم حاجة بدعى ربنا على طول انه يقدرنى على زيارة بيته . انول الفرصة دى واعمل حجة وعمرة ان شاء الله . وربنا الوحيد اللى يعرف انا قد ايه نفسى احقق الحلم ده .....

2) بالنسبة للعمل . نفسى ربنا يكرمنى وأوصل لمنصب كويس فى شغلى . وده طبعا مش هيحصل بسهولة . لكن بعد وقت وتعب وانا ان شاء الله مستعده .........

3) ربنا يكرمنى وأحقق الحلم الغالى على قلبى وأقدر انجح بتقدير كويس فى الجامعه المفتوحة/ كلية أعلام . وبعديها احاول انى اعمل اللى بتمناه وهو انى اعمل برنامج فى الاذاعة . ويبقى من اعدادى وتقديمى ........ادعولى

4) القى أنسان كويس ويعرف ربنا . يعوضنى عن اللى فات ونبتدى مع بعض فى الحياة بحلوها ومرها . يكون ليه نعمة الزوج والاخ والاب والصديق . وكل حاجة حلوة ممكن احتاجها من الدنيا القيها معاه . ويكرمنا بالزرية الصالحة . عشان نفسى أجيب ياسين اوحمزة . وكمان فى بنت اسميها ملك او مريم .........ادعولى

5) دى كان نفسى اخليها اول حاجة فى الحاجات . نفسى احقق لنفسى احساسى بالأمان . عشان انا دايما مفتقداه او ممكن اكون عمرى ما حسييت بيه اصلا ....... وبينى وبينكم الدنيا دى بقى صعب الواحد يحس فيها بالأمان ...........

6) نفسى ربنا يجعلنى سبب فى صلاح حال البلد دى . يعنى بتمنى الناس يتلم شملها من تانى زى زمان وطبعا اكون معهم ويقدروا يطالبوا بحقوقهم وبتحقيق ابسط احلامهم اللى بقوا محرومين منها . نفسى المصرى يرجع تانى موضع احترام من العالم كله . والشباب يبقوا عندهم عزيمة انهم يحققوا المستحيل . واللهى هيقدروا ............

7) نفسى ربنا يكرم اسرتى وأشوفهم احسن الناس . ويفضلوا طول العمر بأفضل حال .................

ها مليتوا منى والا لسه ..... يارب يكون لسه

سبع حاجات معرفتش تعملهم!!!!

1) كان نفسى أفضل مده أكبر مع ولدتى . لأنى ملحقتش استمتع بحنانها عشان أتوفت وانا عندى 3 سنين .

2) أتمنيت أرتبط بشخصية حلمت بيها كتير بس لما لقيتها . للأسف كانت بقت لغيرى . بس انا مش زعلانة . عشان وعسى أن تكرهو شيئا وهو خير لكم

3) كان نفسى أحس بأستقرار وأمان من زمان قوى بس الزمن ساعات بيبقى قاسى . بس ولو الحمد لله على كل حاجة دلوقتى أقدر اعمل حاجات كتير وأعوض اللى فات

4) أتمنيت أكمل تعليمى زمان . لكن الظروف مسمحتش . لكن دلوقتى خلاص الحمد لله . عشان كده التحقت بكليه الاعلام / تعليم مفتوح . وان شاء الله اخلصها على خير

5) كان نفسى اكمل باقى الحاجات اللى كان نفسى اعملها ومقدرتش بس الحقيقة أخر اتنين مش هقدر أقولهم

سبع حاجات دايما بتقولهم !!!؟

1) لا حول ولا قوة الا بالله . لما بسمع خبر وحش

2) الحمد لله . على كل حاجة ربنا بيكرمنى بيها

3) اشطاط

4) يا وله . لأى حد من زمايلى

5) اتشألبوا . عندى فى البيت او الشغل او مع اى حد من اللى اعرفهم . بقولهم اشألبوا اعملوا كذااا

6) اسم الشخص اللى انا بحبه ..........................

7) طظ . فى اى حد يبعنى .هههههههههههههههههههههههههه

معلش انا عندى فى 8) يا مسهل . لما انوى أعمل أى حاجة

نخش بقى على اللى الدور عليه

سبع مشكلات فى حياتك ممكن تحلهم بالفلوس!!!

منكرش ان الفلوس مهمة جدا فى كل حاجة وهى لغة التعامل دلوقتى بين الناس . وعشان كده الفلوس مش بس هتحل سبع مشكلات دول هيكونوا الاف المشكلات . وبعدين اللى عندهم فلوس كتييييير بيكون عندهم مشكلات مبيقدروش يحلوها بالفلوس . يبقى اهم من الفلوس فى حل المشاكل وقوف المولى عز وجل جنبى وهو ده اللى هيكون سندى فى حل اى مشكلة مش مجرد شوية فلوس

سبع أماكن بتحبها!!!!!

1) أسكندرية . وخصوصا فى الشتا

2) البيت . بحب بيتنا جدااااااا وخصوصا اوضتى

3) الجامعه . عشان ببقى مع أصحابى

4) ساقية عبد المنعم الصاوى

5) اتمشى على النيل . مفيش اجمل من كده متعة

6) الشركة اللى بشتغل فيها . عشان بحب شغلى جدااااا

7) كان المفروض تبقى الاولى . بيت ربنا اللى مفيش راحة قد الراحة اللى بحسها وانا فيه

يا مسهل تقريبا هانت عشان شكلكم اتخنقتوا . صح

سبع أشخاص بحبهم غير بابا وماما واخواتى!!!

1) انا عاشقة لشخصية . سيدنا عمر أبن الخطاب

2) أصدقائى سواء فى الشغل او الجامعه

3) بحب قوى أحمد السقا

4) بحب قوى فاروق جويدة عشان كتباته الرائعة

5) بحب قوى أحسان عبد القدوس . برده عشان كتباته الرائعة

6) بحب قوى الحاجة عبلة الكحلاوى وبرنامجها

7) بحب جدا الفنانة أصاله . عشان هى بجد فنانة محترمة ...............

يا مسهل .................

سبع حاجات بتحبهم قوى!!!!

1) بحب قوى منظر السما والمية . سواء النيل او البحر

2) فيلم صلاح الدين الايوبى

3) كتابة الخواطر اللى بحس بيها

4) اتكلم مع الناس الاكبر منى فى السن . بحس انى بستفاد قوى منهم

5) الشاى . المشروب المفضل ليه

6) الشتا . اجمل فصول السنة

7) عروستى اللى مش بتفارق سريرى

وأخيـــــــــــرا ..................

سبع مدونات بتحب تقرالهم!!!!

بجد ومش مبالغة . كل المدونات اللى كتباها فى فرسان الكلمة . بحب جدا اقرالهم . وكل مدونة فيهم بتدينى حاجة بدور عليها . عشان كده كلهم أجمل من بعض . ويارييت يكون ده رأيهم فيه .

ويارييت تكونوا مملتوش منى ابدا ومن كلامى . وأكون خفيفة على قلبكم . وتكون فعلا أجاباتى واضحة وصدقونى هى صريحة قوى .

وبجد انا بشكر الشاعر والصحفى / عماد الدين يوسف . عشان اهدانى التاج ده . وادانى فرصة اكبر انى اعرفكم على نفسى . وحبة اقوله انه مثل أعلى ليه فى حاجات كتير . وانا فخورة ان ليه صديق زيه

أنـــــا بهــــــــدى التـــــاج ده لصـــــديقتى صاحبـــــــة مدونـــــــة ضـــــد التيــــــــار

هناك 17 تعليقًا:

ضد التيار يقول...

بجد من كتاتبك كنت دايما بقول انك حد كويس قوى

التاج دا اثبت كلامى و بجد انتى حد حلو وكويس و جميل

ربنا يحققلك كل احلامك يارب

محمود حسن العدل يقول...

السلام عليكم
بجد اجابتك اكتر من ممتازة
حتى الاماكن اتللى انتى بتحبيها
بس الغريب انى مش شفتك هناك خالص لان انا كمان بروح ساقية الصاوى والاوبرا المركز الاعلى للثقافة .
ربنا يكرمك ويحقق لك امالك اللهم امين ويوعدك بالزوج الصالح اللى يقدرك وتخلفى الذرية الصالحة .
انتى مش كنتى محتاجة التاج على شان نعرف منة انتى مين .
كتابتك واحساسك قالو من زمان انتى مين
بجد كان نفسى اكون اول تعليق لكن دايما ضد التيار بتسبقنى
تحيااااااااااااااااااااااااااااااااتى

كيارا يقول...

الللللللللله علي اجاباتك

بجد الله


وربنا يرزقك مريومه اللي تنور طريقكك


تحياتي للجميله

mohamed ghalia يقول...

بجد إنتى شخصيه هايلة قوى ربنا يزيدك
ويارب تحققى كل أحلامك
وبالتوفيق دايما
دمتى بود

ضد التيار يقول...

ايه دا ايه دا ايه دا

ايه اللى انا شايفه دا

انا لما علقت ماكنش مكتوب كدا

عاااااااااااااااااااااااااااااااااااااااااااااااااااا

و كمان اجى الاقى محمود كمان بيقول انى باخد منه التعليق الاول

عااااااااااااااااااااااااااااااا تانى

----------

اشكرك ياقمر على التاج وطبعا مقبول و هاخده واحله ان شاء الله

و انا يشرفنى انى اكون صديقتك اكيييييييييييييد

دمتِ بكل حب و ود

طـــائر الليــــل الحـــــزين يقول...

ضد التيار
بشكرك يا قمر على تعليقك على ردودى . وانا كمان حسة انى كسبت حد كويس . وكمان متشكرة انك قبلتى التاج
تحياتى

طـــائر الليــــل الحـــــزين يقول...

محمود حسن العدل
بجد مش لقية رد اقولهولك . انت قولت انى بتفنن فى ردى على تعليقاتك . فامبتلئيش حاجة تقولهالى
بالعكس انا اللى مش لقية رد على كلامك الجميل قوى ورأيك الحلو فية وبشكرك عليه جدااااا
وعلى فكرة انا بروح الساقية كتيييير بس طبعا شيىء بديهى لأننا منعرفش شكل بعض . وكل اللى هقدر اقوله . انى بشكرك على تعقيبك الحلو للتاج
تحيــــــــاااااتى

طـــائر الليــــل الحـــــزين يقول...

كيارا
انا بقييت بخاف منك بعد اللى قريته فى أخر بوست ليكى .
بس عموما انا بحب خفة دمك جدااا
وربنا يحققلك انتى كمان كل احلامك
تحياااااااتى

طـــائر الليــــل الحـــــزين يقول...

mohamed ghalia
بجد انا بشكرك جدا على كلامك ليه . وعلى تعقيبك على التاج . ومتشكرة انك بقيت دائم التواجد فى المدونة ومتابع رائع ليها .
تحيـــــــــــاااتى

☼♫♪ عمــاد الدين يــوسف ☼♫♪ يقول...

الباشاااااااااا باشااااااااا
ههههههههههههههههه
اختي الحبيبه مونمون دايما توب
( يعني في الصداره ) في كل شئ ، واجاباتك بتعكس شخصيه نادره وبنت بلد جدعه يتمنى اي انسان الارتباط بيها لانها كفيله باسره نموذجيه بمعنى الكلمه وعلى الرغم من ان شهادتي فيكي مجروحه الا اني برضو فخوور جدا بصداقتك الغاليه انتي فعلا مزودتيش لما قلتي انك بمية راجل لانك كده فعلا وياما مواقف ليكي فيها فضل عليا اثبتت كلامي
من الآخر يجدعـــــــــــان
مونمون اجدع ناس ههههههه
تحياتي

saso يقول...

هاى يا قمر ازيك

اجاباتك جميييييله وعرفتنا على شخصيه جميله

ربنا يوفقك

romansy يقول...

كل تاج وانتى طيبه
انتى صريحه قوى ودا باين من كلامك
بس اللى بيحب البحر والشتا والميه يبقى ليه يكون حزين
دا يكون اسعد انسان فى الدنيا

طـــائر الليــــل الحـــــزين يقول...

الشاعر والصحفى / عمــــاد الدين يوسف .
يأبنى انت اللى باشا . وبجد انا بشكرك على رأيك فيه . اكيد معاك انت هيكون مختلف . عشان احنا زملة فى الجامعة والجريدة وكمان فى أرائنا . وواللهى يا عماد انا فرحانة انك صيديقى المفضل والقريب
تحيـــــاتى ليك يا قمر

اهالينا زهقوا يربونا يقول...

هاى يا قمر ازيك:

انتى عرفانا وعارفه راينا واتذكر عندك قبل كده
بس عشان تتاكدى هنستناكى

طـــائر الليــــل الحـــــزين يقول...

romansy
بشكرك على زيارتك الاولى للمدونة . وكمان على تعقيبك الجميل قوى . وحبة انى اضيفلك انى مقولتش انى حزينة .وعموما اى شخص فى الحياة عنده بأستمرار مشاعر متناقضة بين فرح وحزن
تحيـــــاتى ليك
----------------------
saso
بشكرك يا قمر على تعقيبك . ورأيك فى اجاباتى .
تحيــــــاتى

ريمان يقول...

السلام عليكم

بجد تاج جميل واجاباتك جميله

انا برضه زيك بحب سيدنا عمر بن الخطاب ليه مكانه خاصه فى قلبى بجد بحبه اوىىى


وربنا يرحم والدتك ويجمعك معاها فى الجنه ان شاء الله

مع تحياتى

ريمان

طـــائر الليــــل الحـــــزين يقول...

ريمــــان ......
بشكرك يا قمر على تعقيبك . وعلى كلامك الســـاحر . وبجد دى حاجة تبسطنى جداااا . اننا مشتركيين فى حب شخصية زى شخصية سيدنا عمر ابن الخطاب .. بحييكى على الزياره